Një trup i pajetë, i gjetur në trafikndarësen e autostradës Milot-Thumanë, në fshatin Shullaz, është identifikuar nga autoritetet. Sipas policisë, trupi i dekompozuar dyshohet t’i përkasë shtetasit E. N., 49 vjeç, banues në Laç.

Trupi është zbuluar mëngjesin e sotëm, rreth orës 08:50, nga punonjësit e mirëmbajtjes së rrugëve, të cilët po kryenin detyrat e tyre rutinë në këtë aks. Menjëherë pas konstatimit, ata kanë njoftuar policinë, e cila ka nisur hetimet për zbardhjen e rrethanave të ngjarjes.

Nga të dhënat paraprake, dyshohet se 49-vjeçari ka humbur jetën disa muaj më parë, si pasojë e një aksidenti rrugor. Hetuesit mendojnë se ai mund të jetë përplasur nga automjete, por shkaqet e sakta të vdekjes do të përcaktohen pas kryerjes së autopsisë.

Grupi hetimor, në bashkëpunim me Prokurorinë, po vijon punën për dokumentimin e plotë të kësaj ngjarjeje tragjike.