Media greke Protothema ka publikuar një artikull kritik ndaj kryeministrit shqiptar Edi Rama, duke e akuzuar atë për përdorimin e marrëdhënieve shqiptaro-greke si një strategji elektorale. Sipas këtij artikulli, Rama synon vetëm të përfitojë politikisht nga një “miqësi fallco” me Greqinë, ndërsa në realitet, politika e tij e jashtme është e orientuar drejt Ankarasë.

Protothema thekson se Rama nuk ka treguar një sjellje miqësore ndaj zyrtarëve grekë, madje gjatë vizitave të tyre në Tiranë janë organizuar protesta.

Në analizën e saj, media greke e akuzon Ramën se:

• Ka ndikuar në anulimin e Marrëveshjes së Detit me Greqinë përmes një vendimi të Gjykatës së Lartë, duke përdorur argumente të ngjashme me ato të Ministrisë së Jashtme turke në lidhje me Egjeun.

• Ka marrë urdhra nga Ankaraja, sipas akuzave të ish-kryeministrit Sali Berisha.

• Ka lidhje të ngushta me presidentin turk, Recep Tayyip Erdogan, të cilin e konsideron si aleat të tijin kryesor.

• Arrestimi i Fredi Belerit dhe situata në Himarë përbëjnë një mesazh të qartë për minoritetin grek dhe për Athinën.

• Interesat ekonomike të mbrojtura nga qeveria shqiptare po shkatërrojnë zonat turistike, duke dëmtuar edhe pronat e minoritetit grek.

Ky artikull vjen në një moment delikat për marrëdhëniet mes dy vendeve, në një kohë kur Rama ka bërë thirrje për përmirësimin e raporteve mes Shqipërisë dhe Greqisë.