Gjykata e Posaçme ka sekuestruar 31 pasuri të dy anëtarëve të një grupi kriminal, Jusel Mici dhe Mendim Domi, të cilët ndodhen në gjykim për mashtrim përmes call center dhe veprimtari të strukturuar kriminale. Sekuestrimi është bërë me kërkesë të SPAK, ndërsa hetimet zbuluan pasuri të pajustifikuara me burime të ligjshme.
Në emër të Jusel Micit dhe familjarëve të tij u sekuestruan 21 pasuri, mes të cilave:
- 4 apartamente në Tiranë
- 5 parcela toke në Mazrek, me sipërfaqe totale 17,000 m²
- 6 hapësira garazhi dhe një njësi biznesi
- 20% e aksioneve të shoqërisë tregtare “Super Foods”
- Një vilë në “Lalzi Marina Seaside” në Gjirin e Lalëzit
- 3 automjete luksoze
Ndërsa Mendim Domit iu sekuestruan 10 pasuri, përfshirë:
- 14,000 m² tokë në Mazrek dhe Kashar
- 1 apartament në Tiranë
- Një vilë në kompleksin “San Pietro” në Gjirin e Lalëzit
- 40% e aksioneve në “Super Foods”
- 3 llogari bankare me qindra mijëra euro
SPAK bëri të ditur se pasuritë janë sekuestruar në kuadër të procedimit pasuror ndaj dy të pandehurve, bazuar në ligjin për goditjen e krimit të organizuar dhe korrupsionit. Ata akuzohen për “Mashtrim kompjuterik”, “Grup të strukturuar kriminal” dhe “Kryerjen e veprave penale nga organizata kriminale”.
Ky operacion është një tjetër goditje ndaj grupeve kriminale që kanë përfituar në mënyrë të paligjshme përmes mashtrimit dhe aktiviteteve të tjera të jashtëligjshme. Hetimet për pasuritë e tyre vijojnë, ndërsa gjykimi ndaj të akuzuarve është në proces.
