Kreu i Komisionit Qendror të Zgjedhjeve (KQZ), Ilirjan Celibashi, ka deklaruar se brenda javës së ardhshme pritet të përzgjidhet kompania ndërkombëtare që do të marrë përsipër procesin e dërgimit të zarfeve të votimit për emigrantët dhe kthimin e tyre në Shqipëri. Ai shtoi se deri tani, 245,975 shqiptarë nga 294,155 që shprehën interesin për t’u përfshirë, kanë fituar të drejtën e votës nga Diaspora.

Celibashi theksoi se midis fundit të javës së parë të prillit dhe javës së dytë të prillit do të nisin dërgimi i fletëve të votimit dhe dokumentacionit tjetër zgjedhor për votuesit jashtë vendit. Ai synon që deri më 8-16 prill, të përfundojë procesi i dërgimit të fletëve të votimit. Në përfundim, ai beson se deri në fund të javës tjetër do të jenë përfunduar procedurat për përzgjedhjen e operatorit të shërbimit postar.