Toronto u trondit mbrëmjen e djeshme nga një ngjarje e rëndë me armë zjarri, ku të paktën 12 persona mbetën të plagosur pas një sulmi të ndodhur në një lokal në lindje të qytetit.
Sipas mediave ndërkombëtare, autori i dyshuar është ende në arrati. Ai raportohet se kishte veshur një kapuç të zi dhe u largua nga vendngjarja me një automjet ngjyrë gri.
Zyrtarët u kanë bërë thirrje qytetarëve që të shmangin zonën pranë qendrës tregtare Scarborough Town Centre, ku ndodhi sulmi. Ekipet e ndihmës së shpejtë konfirmuan se disa nga të plagosurit kanë marrë lëndime të lehta, ndërsa disa të tjerë janë në gjendje kritike. Katër persona raportohet se kanë plagë jo kërcënuese për jetën, por gjendja e të tjerëve mbetet ende e paqartë.
Një zëdhënës i shërbimeve të zjarrfikësve tha për CBC News se ekipet e emergjencës ndërhynë menjëherë pas raportimeve për të shtëna me armë zjarri. Megjithatë, autoritetet nuk kanë dhënë ende detaje për motivin e mundshëm të sulmit.
Kryebashkiakja e Torontos, Olivia Chow, reagoi përmes rrjeteve sociale, duke shprehur solidaritet me viktimat dhe familjet e tyre.
“Ky është një hetim i hershëm dhe në vazhdim – policia do të japë detaje të mëtejshme. Mendimet e mia janë me të plagosurit dhe familjet e tyre.”
Hetimet mbi ngjarjen po vijojnë, ndërsa forcat e rendit janë në kërkim të autorit të dyshuar.
