Në një banesë njëdhomëshe në Prishtinë, Jehona ka disa muaj që jeton me qira. E ndarë nga ish-bashkëshorti, ajo po rrit djalin e vogël e vetme dhe punon dy punë për të mbuluar shpenzimet.

Jehona – emër i vendosur nga redaksia për t’ia ruajtur anonimitetin – vendosi të largohej nga një martesë ku, sipas saj, kishte përjetuar dhunë në familje për vite me radhë.

“E kam nisur nga zeroja. Se unë trashëgimi prej babait nuk kam. Por, s’e kam problem. Vetëm ta kem shëndetin se punoj”, shprehet ajo.

Ajo pretendon se ish-bashkëshorti ka pasuri të konsiderueshme, por ka bërë gjithçka për të shmangur ndarjen e saj pas divorcit.

“Ai ka blerë banesë, ka veturë. I ka transferuar të gjitha në emër të vëllait, të babait, që të mos i ndajë me mua”, thotë Jehona.

Sipas Ligjit për Familjen në Kosovë, pasuria e krijuar gjatë martesës konsiderohet pasuri e përbashkët, që duhet të ndahet në mënyrë të barabartë pas divorcit. Megjithatë, raste si ai i Jehonës tregojnë se shpesh gratë ballafaqohen me sfida të mëdha për të kërkuar të drejtat e tyre ligjore.