Princi Frederik i Luksemburgut ka ndërruar jetë më 1 mars në Paris, pas një beteje të gjatë me sëmundjen e rrallë gjenetike POLG, e cila pengon prodhimin e energjisë në qeliza dhe shkakton dëmtim të shumëfishtë të organeve. Lajmi është bërë i ditur nga familja e tij në faqen zyrtare të Fondacionit POLG, që Frederik e themeloi në vitin 2022.
Në një mesazh prekës, babai i tij, Princi Robert i Luksemburgut, njoftoi për ndarjen nga jeta të djalit të tij, duke e cilësuar atë si themelues dhe drejtorin kreativ të fondacionit. “Me zemër të thyer, gruaja ime dhe unë dëshirojmë të informojmë për ndarjen nga jeta të djalit tonë”, shkroi ai.
Frederik, i diagnostikuar me POLG në moshën 14 vjeçare, e dinte që do të jetonte me një sëmundje të pashërueshme, por ai nuk u dorëzua. Pavarësisht gjendjes së tij shëndetësore, ai vazhdoi të jetonte me forcë dhe guxim, duke u përkushtuar për të rritur ndërgjegjësimin për sëmundjet e rralla. Ai mori pjesë në teste mjekësore me shpresën për të gjetur trajtime, ndërkohë që nuk ndaloi as aktivitete të përditshme, përfshirë mësimin e gjuhës italiane në Duolingo dhe ushtrimet e përditshme.
Një mik i tij ndau një deklaratë emocionuese të Frederik: “Jam i lumtur që unë kam këtë sëmundje. Edhe pse do të vdes prej saj… e di që prindërit e mi do të shpëtojnë fëmijë të tjerë”.
Frederik u shua në Paris, por trashëgimia e tij, si një simbol i forcës dhe guximit për të luftuar për të mirën e të tjerëve, do të vazhdojë të jetojë.
