Autoritetet policore në Maqedoninë e Veriut kanë ndërmarrë një operacion të gjerë në lidhje me tragjedinë që ndodhi më 16 mars, ku humbën jetën 59 të rinj dhe u plagosën 178 të tjerë pas një zjarri që shpërtheu në një lokal nate në qytetin e Koçanit. Hetimet janë të udhëhoqura nga Prokuroria Themelore Publike e Koçanit.

Në kuadër të këtij operacioni, policia ka ndaluar ish-kryetarin e Komunës së Koçanit, Ljupço Papazov, së bashku me dy paraardhësit e tij, Nikollço Iliev dhe Ratko Dimitrovski. Papazov është marrë në pyetje më 17 mars dhe ka dhënë sqarime lidhur me çështjen, të cilat tani po krahasohen me provat dhe kompetencat e komunës për të përcaktuar përgjegjësitë. Hetimet kanë përfshirë gjithsej 26 persona, përveç tre të ndaluarve të fundit.

Sipas autoriteteve, lokali ku ndodhi tragjedia kishte operuar me një licencë të falsifikuar dhe për vite me radhë nuk kishte plotësuar kushtet e sigurisë të kërkuara për një klub nate. Zjarri dyshohet se ka shpërthyer nga shkëndijat që dolën nga mjetet piroteknike gjatë një koncerti. Në shenjë zie për humbjen e jetëve, Maqedonia e Veriut ka shpallur shtatë ditë zie kombëtare. Hetimet vijojnë për të zbardhur plotësisht ngjarjen dhe për të identifikuar përgjegjësit e tragjedisë.