Familja Gushi e cila u shua në aksidentin tragjik këtë të premte ishte nga Patosi edhe pse jetonin prej vitesh në Greqi. Këtë verë, pas një viti të vështirë pandemie, ata zgjodhën vendlindjen për të bërë pushimet.

Mëngjesin e sotëm ata ishin nisur për në qytetin bregdetar të Vlorës, por një aksident i rëndë rrugor u mori jetën, të katër anëtarëve të familjes.

Prindërit dhe dy vajzat e tyre të mitura humbën jetën pasi makina me të cilën udhëtonin u përplas nga një automjet Audi.

Bashkia e Patosit, në një reagim në rrjetet sociale, thotë se do të marrë përsipër mbulimin e shpenzimeve të ceremonisë mortore për këtë familje.

REAGIMI I BASHKISE PATOS

I trishtë dhe i dhimbshëm lajmi për ndarjen tragjike nga jeta të 4 bashkëqytetarëve tanë. Me miqtë e familjarët e tyre sot është pikëlluar edhe i gjithë qyteti.

Bashkia Patos shpreh ngushëllimet më të sinqerta të afërmve të familjes Gushi që humbën jetën tragjikisht në një aksident në aksin Fier-Vlorë.

Përmes një mbledhjeje urgjente të Këshillit Bashkiak, Bashkia Patos vendosi të marrë përsipër mbulimin e shpenzimeve të ceremonisë mortore për këtë familje.
U prehshin në paqe. I qoftë dheu i lehtë!
#BashkiaPatos