Një javë para nisjes zyrtare të fushatës elektorale, Shqipëria do të presë ardhjen e një figure të njohur të fushatave politike amerikane, Chris LaCivita, i cili do të drejtojë ekipin e fushatës së Partisë Demokratike.
Lajmi u konfirmua nga Edit Harxhi, kandidate për deputete nga radhët e PD-së, gjatë një interviste në emisionin Log. Sipas saj, LaCivita do të qëndrojë në Shqipëri gjatë gjithë fushatës, ku do të jetë prezent në çdo hap, që nga hapja e fushatës ditën e shtunë, deri në prezantimin e programit elektoral më 12 prill.
“Zoti LaCivita vjen nesër. Do të drejtojë fushatën gjatë gjithë kohës këtu në Shqipëri. Do të qëndrojë në Tiranë. Do të jetë këtu gjatë gjithë kohës. Ai do të jetë personi që do drejtojë fushatën, do jetë në hapjen e fushatës dhe do të jetë edhe në prezantimin e programit elektoral në datën 12.”, – tha Harxhi.
Ajo paralajmëroi se ardhja e tij do të shoqërohet me “surpriza” dhe zhvillime të bujshme politike, të cilat sipas saj do të “ndriçojnë rrugën e fitores së PD”.
Chris LaCivita është një strateg republikan i njohur në SHBA, i përfshirë në fushata të profilit të lartë, përfshirë edhe ato të ish-presidentit Donald Trump. Pritet që prania e tij të sjellë një frymë të re strategjike në organizimin dhe komunikimin e fushatës së demokratëve.
