Një krim i rëndë ka tronditur opinionin publik në Itali, ku Mark Samson dyshohet se ka vrarë me thikë studenteshen shqiptare Ilaria Sula, vetëm 22 vjeç. Sipas raportit të ekspertizës mjeko-ligjore, viktima është goditur disa herë me thikë, ndërsa gjurmët e krimit janë identifikuar në shumë pjesë të banesës në via Homs 8, në lagjen afrikane të Romës.

Hetimet tregojnë se vrasja ndodhi mbrëmjen e 25 marsit dhe jo në mëngjesin e 26-tës, siç kishte pretenduar fillimisht autori i dyshuar. Trupi i pajetë i Ilaria Sulës u gjet më 2 prill në një shpat të malit Guadagnolo, në komunën Capranica Prenestina, disa ditë pas ngjarjes.

Skena e krimit ishte përpjekur të pastrohej, por policia mjeko-ligjore gjeti sasi të mëdha gjaku në banesë, veçanërisht në korridore, në dush, lavamanë dhe madje edhe te furçat e dyshemesë dhe dorezat e dyerve. Gjurmë janë gjetur gjithashtu në makinën e Mark Samsonit.

Faktet rëndojnë edhe më shumë mbi të dyshuarin: më 26 mars ai bleu produkte pastrimi në një dyqan pranë banesës, gjë që është konfirmuar nga fatura e transaksionit. Edhe pse ai tentoi të zhdukë gjurmët, ekspertiza ka zbuluar shenja të dukshme gjaku në shumë sipërfaqe. Sipas hetuesve, dyshohet se disa persona të tjerë mund të kenë ndërhyrë për të ndihmuar në pastrimin e vendngjarjes.

Hetimet janë në vijim, ndërsa ngjarja ka ngritur shqetësime të mëdha në publik për natyrën brutale të krimit dhe përpjekjet për fshehjen e tij. Mark Samson ndodhet në paraburgim dhe pritet të përballet me akuza të rënda për vrasje të qëllimshme dhe pengim të drejtësisë.