Një tjetër akt i rëndë kriminal ka tronditur opinionin publik mbrëmjen e së enjtes në fshatin Pllanë të Lezhës, ku një person u ekzekutua me armë zjarri. Viktima është babai i Roan Brahimit, i njohur ndryshe si Sidorel Prendi – emër i përfolur në qarqet kriminale dhe i vrarë më 9 maj në Athinë, brenda automjetit të tij luksoz.

Ngjarja e rëndë vjen vetëm pak ditë pas atentatit të Brahimit në Greqi, ku autoritetet e atjeshme dyshojnë për një zinxhir hakmarrjesh me rrënjë në Shqipëri. Mediat greke raportuan se Brahimi kishte ardhur nga Dubai dhe se mund të ishte i përfshirë në një konflikt të përgjakshëm mes bandave rivale.

Roan Brahimi, i njohur edhe si “Sidi”, përmendej si rival i Ervis Martinajt, “mbretit të zhdukur të kumarit”, i cili u zhduk pa gjurmë në gusht të vitit 2022. Ai ishte gjithashtu i dyshuar për përfshirje në vrasjen e Gentjan Bejtjes, ndodhur më 15 mars në Larushk të Krujës.

Policia ndodhet aktualisht në vendngjarje, ku ka nisur hetimet intensive për të zbardhur motivet e këtij atentati dhe për të verifikuar lidhjen e ngushtë të ngjarjes me vrasjen e Roan Brahimit. Ekzekutimi i të atit pritet të ndezë më tej spiralen e dhunës mes grupeve kriminale shqiptare, të cilat duket se po e shtrijnë aktivitetin dhe hakmarrjet përtej kufijve.

Ngjarja në Lezhë është vetëm një pjesë e një panorame të errët kriminale që tregon sa i thellë është ndikimi i bandave dhe si hakmarrjet familjare vijojnë të mbeten një rrezik serioz për sigurinë publike në Shqipëri dhe jashtë saj.