Policia e Tiranës, edhe pse pa prova konkrete, ka krijuar bindjen se sulmi me armë zjarri i ndodhur dy ditë më parë në zonën e Lundrës nuk kishte në shënjestër katër personat që ndodheshin në automjetin “G-Class”.

Kjo bindje është forcuar nga deklarimet e marra dhe informacionet mbi babain e dy fëmijëve të mitur, të cilët pas plagëve të marra janë nisur drejt Romës për mjekim të specializuar.

Për të përcaktuar se kush mund të ketë qenë shënjestra e vërtetë, hetuesit kanë nisur një verifikim të pronarëve të automjeteve “G-Class” që banojnë në zonën rezidenciale të Lundrës. Ata po merren në pyetje për të kuptuar nëse ndonjëri prej tyre mund të ketë qenë në atë segment rrugor në orën e sulmit.

Burime nga grupi hetimor thanë se ndjekja ka nisur që nga rrethrrotullimi i Shkozës, ku autorët në motor kanë nisur të ndjekin mjetin luksoz. Shoferi i familjes kishte pikasur motorin, por nuk i kishte kushtuar vëmendje për shkak të reshjeve të shiut.

Pasi qëlluan me armë, autorët u larguan në drejtim të panjohur. Ende nuk ka të dhëna për gjetjen apo djegien e motorit, dhe po vijon marrja e pamjeve të kamerave të sigurisë përgjatë gjithë zonës.

Një tjetër pistë që po hetohet është ajo e një sulmi të mundshëm ndaj bashkëshortes së Roan Brahimit, babai i të cilit u vra 40 minuta para ngjarjes në Lundër. Ajo jeton në të njëjtën zonë dhe për këtë arsye dyshohet se mund të ketë qenë objektivi i atentatit. Megjithatë, sipas policisë, ajo përdor një mjet “Audi” dhe jo “G-Class”, çka për momentin e bën këtë pistë më të paqartë.