Një ngjarje tragjike ka ndodhur pasditen e së shtunës, më 20 prill, në qytetin Clermont-Ferrand të Francës, ku një 19-vjeçar shqiptar është qëlluar për vdekje pranë stacionit të trenit SNCF, në fund të Avenue Charras.
Sipas raportimeve të mediave franceze, atentati ndodhi rreth orës 20:30, kur një automjet iu afrua viktimës dhe një person hapi zjarr nga brenda makinës. I riu shqiptar mbeti i vdekur në vendin e ngjarjes, ndërsa autori arriti të largohej në drejtim të panjohur.
Identiteti i viktimës nuk është bërë ende publik, ndërkohë që hetimet janë në vijim dhe policia franceze po punon për identifikimin dhe kapjen e autorit. Deri tani, nuk janë dhënë detaje mbi motivet e krimit apo lidhjet e mundshme të viktimës me autorin.
Ngjarja ka shkaktuar tronditje në komunitetin shqiptar dhe më gjerë, ndërsa autoritetet franceze janë vënë në kërkim të autorit të armatosur që është ende në arrati.
