Rreth 12 orë pas njoftimit të ndarjes nga jeta të Papa Françeskut, Vatikani ka publikuar certifikatën zyrtare të vdekjes, ku konfirmohet se goditja cerebrale ka çuar në komë dhe më pas në dështim të pakthyeshëm të zemrës.

Papa vuante prej kohësh nga një sëmundje kronike e mushkërive, që rëndoi ndjeshëm gjendjen e tij shëndetësore në vitet e fundit. Më 14 shkurt, ai u shtrua në spitalin Gemelli pas një krize të fortë frymëmarrjeje, që më pas u diagnostikua si pneumoni e dyfishtë.

Pas 38 ditësh qëndrimi në spital, Papa u shfaq sërish në publik të dielën e Pashkëve, vetëm një ditë para vdekjes, për të bekuar mijëra besimtarë të mbledhur në Sheshin e Shën Pjetrit.

Lamtumira e tij ka lënë një boshllëk të madh në mbarë botën katolike dhe përtej saj, duke sjellë reagime të shumta nga liderë fetarë, politikë dhe qytetarë të zakonshëm.