Gjirokastër, 22 prill 2025 – Prokuroria pranë Gjykatës së Shkallës së Parë të Juridiksionit të Përgjithshëm në Gjirokastër ka nisur hetimet lidhur me ngjarjen tragjike të ndodhur më 20 prill 2025, ku një i mitur, shtetasi V.P., 15 vjeç, u gjet i vetëvarur në ambientet e jashtme të banesës së tij në fshatin Valare.

Sipas njoftimit të Prokurorisë, pas njoftimit të Policisë së Gjirokastrës, është ngritur një grup hetimor me urdhër të Drejtuesit të Prokurorisë. Hetimet janë duke u drejtuar nga prokurori i seksionit për të mitur dhe prokurori i gatshëm. Deri tani, janë kryer disa veprime hetimore, përfshirë këqyrjen e vendit të ngjarjes dhe ekspertizën mjeko-ligjore. Po ashtu, janë sekuestruar pajisje elektronike, përfshirë telefonat dhe kompjuterët, si dhe materialet shkollore të të miturit.

Gjithashtu, janë marrë deklarata nga persona që mund të kenë dijeni për rrethanat e ngjarjes, përfshirë punonjës të institucioneve përgjegjëse për trajtimin e të miturit. Sipas Prokurorisë, deri tani nuk ka asnjë indicie që të tregojë se ngjarja është pasojë e ngacmimeve apo bullizmit nga bashkëmoshatarët e tij.

Prokuroria ka njoftuar se hetimet do të vijojnë me prioritet për të zbardhur plotësisht shkaqet e ngjarjes, si dhe për të vlerësuar veprimet apo mosveprimet e autoriteteve përgjegjëse në trajtimin e rastit.

Ky rast tragjik ka tronditur komunitetin lokal dhe ka nxitur një shqetësim të madh për shëndetin mendor të të rinjve dhe ndikimin e mundshëm të bullizmit dhe ngacmimeve në jetën e të miturve. Hetimet janë ende në fazën fillestare dhe pritet që informacionet të bëhen më të qarta gjatë zhvillimit të procedurave hetimore.