Prokuroria e Posaçme kundër Korrupsionit dhe Krimit të Organizuar ka shpallur zyrtarisht hapjen e procedurës për përzgjedhjen e Drejtorit të ri të Byrosë Kombëtare të Hetimit (BKH), pasi mandati i drejtueses aktuale, Aida Hajnaj, përfundon më 31 gusht 2025.
Në njoftimin zyrtar të SPAK thuhet se është ngritur një Komision Përzgjedhjeje, i përbërë nga kreu i SPAK, Altin Dumani, dhe prokurorët e posaçëm Arben Kraja dhe Behar Dibra.
Sipas SPAK-ut, kandidatët e interesuar për të drejtuar BKH-në duhet të paraqesin dokumentacionin e nevojshëm deri më 7 maj 2025, duke vërtetuar përmbushjen e të gjitha kushteve ligjore të përcaktuara në nenet 34 dhe 38 të ligjit nr.95/2016.
Kushtet për kandidim:
• Të jenë shtetas shqiptarë;
• Të kenë përfunduar studimet e ciklit të dytë në drejtësi ose arsimin e lartë policor;
• Të kenë eksperiencë si prokuror, punonjës i Policisë së Shtetit, Policisë Gjyqësore apo hetues i BKH-së;
• Të kenë të paktën 5 vite përvojë në çështje që lidhen me korrupsionin, krimin e organizuar apo krime të rënda.
Ky proces përbën një nga hallkat kyçe të reformës në drejtësi, pasi drejtimi i BKH-së konsiderohet një nga pozicionet më të rëndësishme në luftën kundër korrupsionit dhe krimit të organizuar në Shqipëri. Përfundimi i mandatit të Aida Hajnajt vjen në një moment ku institucioni është nën vëmendjen maksimale për rezultatet që ka dhënë dhe pritet të japë në vijim.
