Kryeministri Edi Rama, gjatë një takimi me gratë dhe vajzat në Gjirokastër, theksoi se Shqipëria po ndryshon çdo ditë, duke nënvizuar rolin e investimeve dhe kthimin e shumë emigrantëve në vendlindje. Ai vlerësoi gratë si shtyllë mbështetëse të këtij transformimi dhe u shpreh:

“Gratë janë mbështetja jonë. Shqipëria reale ndryshon çdo ditë. Kjo Shqipëria është një Shqipëri që sot është krejt tjetër. Shumëkush që ishte nisur për Greqi dhe as nuk e mendonte se do kthente sytë nga këto vende, të mendojë dhe të kthehet të investojë.”

Rama tha gjithashtu se imazhi ndërkombëtar i Shqipërisë ka ndryshuar rrënjësisht, duke përmendur Samitin e 16 majit që do të mbahet në Tiranë:

“Në 11 maj kemi zgjedhjet dhe në 16 maj do të presim te Skënderbeu udhëheqësit e të gjithë kontinentit. Nga Londra në Ankara, për Samitin e Europës Politike. E imagjinonin që të ndodhte kjo? Kush e ka imagjinuar ka qenë pak i çmendur, por jo çyryk.”

Në këtë kontekst, ai bëri thirrje për besim në zhvillimet pozitive që po ndodhin në vend dhe angazhim të vazhdueshëm për progresin.