Presidenti i Partisë së Lirisë, Ilir Meta, përmes një postimi të gjatë dhe kritik në rrjetet sociale, ka reaguar ashpër ndaj kryeministrit Edi Rama, duke e akuzuar për shkatërrimin e bujqësisë dhe blegtorisë në vend, veçanërisht në zonën e Përmetit. Ai u ndal te situata e vështirë e fermerëve, duke e ironizuar kreun e qeverisë për “Akademinë e Çobanëve” dhe për pyetjet e tij lidhur me pagat në këtë sektor.

“Pyet INSTAT-in të të tregojë kush e përgjysmoi numrin e bagëtive në Përmet dhe në të gjithë Shqipërinë?”, shkruan Meta, duke shtuar se shumë ferma janë shkatërruar dhe blegtorët po largohen, ndërsa baxhot mezi mbijetojnë.

Meta e akuzoi Ramën për shpopullimin e qëllimshëm të zonave rurale, mosrealizimin e projekteve infrastrukturore si rruga Skrapar–Përmet dhe Përmet–Frashër, dhe për dështimin me fondet IPARD që, sipas tij, janë shpërdoruar.

Ai e mbylli postimin me një premtim të fortë për fermerët shqiptarë:

“Me programin tonë ‘Made in Albania’ nuk do të ketë më pragje artificiale përjashtuese për fermerët, por vetëm mbështetje me pagesa direkte dhe ndihmë konkrete. Fermeri është investitori ynë strategjik që pas 11 Majit do të përfitojë subvencione për çdo kokë bagëti dhe për çdo njësi prodhimi.”

Meta u shpreh i bindur se më 11 maj, përgjigja e Përmetit, Skraparit dhe Kolonjës do të jetë e qartë, jo vetëm në qarqet e tyre, por edhe në qytetet e mëdha dhe Diasporë.