Simpatizanti i njohur demokrat, Ilir Vrenozi, ka publikuar këtë të martë një foto me liderin historik të PD, Sali Berishën, të shoqëruar me përshkrimin: “Po ndodh… kafe burrash”.
Ky postim vjen një ditë pas rrëfimit të Vrenozit në një intervistë për Top Channel, ku tregoi për një ftesë që kishte marrë nga kryeministri Edi Rama për një kafe private pa kamera. Ai deklaroi se refuzoi takimin për shkak të bindjeve të tij të djathta, duke shtuar se nuk mund të ulej në një tavolinë me një njeri që, sipas tij, e ka fyer për 12 vite me radhë.
Gjithsesi, Vrenozi theksoi se nëse Rama do t’i shkonte në shtëpi për vizitë, ai do ta mirëpriste. Ndërkohë, takimi me Berishën konfirmon edhe një herë qëndrueshmërinë e tij në kampin opozitar.
