Një ngjarje e rëndë tronditi komunitetin e vogël të fshatit Oltra, në komunën Lamon të Italisë, pasditen e së martës. Rreth orës 17:00, fqinjët raportuan të shtëna në një banesë familjare, duke alarmuar menjëherë autoritetet.

Policia gjeti të pajetë dy persona: Vladislav Gaio, 50 vjeç, dhe djali i tij 17-vjeçar, Riccardo. Sipas hetimeve paraprake të publikuara nga RAI, dyshohet se babai e ka goditur fillimisht të birin me thikë dhe më pas ka kryer vetëvrasje me armë zjarri.

Në shtëpi ndodheshin edhe bashkëshortja dhe vajza e vogël e çiftit, të cilat fatmirësisht janë të padëmtuara dhe janë marrë nën mbrojtje.

Autoritetet italiane kanë nisur hetimet për të zbardhur motivet që çuan në këtë akt tragjik që ka tronditur jo vetëm familjen, por edhe të gjithë komunitetin lokal.