Një sasi prej 30 kilogramësh kokainë është zbuluar gjatë një kontrolli rutinë nga Zyrtarët e Doganës dhe Sigurisë Kufitare (UDSC) në Zvicër, në qytetin kufitar Chiasso, pranë Italisë.

Lënda narkotike ishte fshehur në mënyrë të sofistikuar brenda një automjeti, të drejtuar nga dy shtetas shqiptarë, përkatësisht 30 dhe 28 vjeç, banues në Shqipëri. Pas marrjes në pyetje, të dy u arrestuan nga Policia Kantonale e Tiçinos.

Prokurori publik Luca Losa po drejton hetimet për këtë rast, i cili konsiderohet një shkelje e rëndë e Ligjit Federal për Narkotikët. Nga verifikimet paraprake, droga nuk dukej të ishte e destinuar për tregun italian, çka i shton kompleksitetin hetimit për të përcaktuar origjinën dhe destinacionin përfundimtar të saj.