Prokuroria e Fierit ka dërguar në gjyq dy persona, një mjek dhe një infermier, të akuzuar për “Korrupsion pasiv” dhe “Shpërdorim të detyrës”, lidhur me shkelje të rënda të protokolleve mjekësore për dhënien e medikamentit “Metadon”.

Sipas hetimeve të Prokurorisë, mjeku me iniciale L.B., toksikolog, ka lëshuar një recetë për përdorimin e “Metadonit” për një person që pretendonte se ishte përdorues i lëndëve narkotike, pa kryer analizat e nevojshme dhe pa pasur rekomandim nga mjeku i familjes. Kjo është bërë kundrejt përfitimit material.

Gjithashtu, infermieri me iniciale E.M., i punësuar në Sektorin e Shërbimit Parësor në NJVKSH Fier, ka dhënë një pacienti dyfishin e sasisë së përcaktuar të “Metadonit”, në kundërshtim me protokollet mjekësore dhe pa regjistrim në kartelën mjekësore, gjithashtu për përfitime materiale.

Çështja është dërguar për gjykim në Gjykatën e Shkallës së Parë të Fierit, ndërsa Prokuroria vijon hetimet për identifikimin e përfshirjeve të mundshme të tjera.