Një çift bashkëshortësh kultivonin kanabis sativa në tokën që ishte në pronësi të tyre në fshatin Gërmenjë të Skraparit. Sipas policisë, pas evidentimit në pranga është vënë gruaja, ndërsa burri është shpallur në kërkim.
Sipas policisë, bashkëshorti ka qenë i dënuar më parë për kultivim dorge.
Gjatë kontrollit, shërbimet e Policisë kanë gjetur kubikë me fidanë të dyshuara kanabis sativa në tokën në pronësi të këtyre shtetasve.
Njoftimi i Policisë
Evidentohet dhe goditet një rast i tentativës për kultivim të bimëve narkotike.
Arrestohet autorja e dyshuar e tentativës për kultivim, shpallet në kërkim bashkëshorti i saj, me precedent të mëparshëm penal në fushën e narkotikëve.
Shërbimet e Policisë Skrapar, në bazë të informacioneve të siguruara, në vijim të kontrollit të territorit, me qëllim evidentimin dhe goditjen e rasteve të tentativës për kultivim të bimëve narkotike, kanë evidentuar në fshatin Gërmenjë, Skrapar, kubikë me fidanë të dyshuar cannabis sativa.
Në përfundim të veprimeve të para hetimore, specialistët për Hetimin e Krimeve në Komisariatin e Policisë Skrapar arrestuan në flagrancë shtetasen H. G., 58 vjeçe dhe shpallën në kërkim bashkëshortin e saj, shtetasin E. G., 58 vjeç (i dënuar më parë për veprën penale “Kultivimi i bimëve narkotike”), banues në fshatin Gërmenjë. Gjatë kontrollit, shërbimet e Policisë kanë gjetur kubikë me fidanë të dyshuara cannabis sativa në tokën në pronësi të këtyre shtetasve.
Materialet i kaluan Prokurorisë së Rrethit Gjyqësor Berat, për veprime të mëtejshme.
