Në Vlorë është konstatuar qarkullimi i një sasie qumështi dhe nënprodukteve të tij të ndotura me aflatoksinë M1, një substancë kancerogjene dhe shumë e rrezikshme për shëndetin e njeriut. Prania e kësaj toksine është konfirmuar nga Agjencia Kombëtare e Ushqimit (AKU), e cila përmes kontrolleve ka zbuluar nivel të lartë ndotjeje në disa mostra të marra gjatë muajve të fundit.

Burime konfidenciale pranë AKU-së bëjnë të ditur se nga 26 mostra të analizuara në periudhën janar–prill 2025, 10 prej tyre kanë rezultuar pozitive, duke treguar se gati 40% e qumështit të kontrolluar ishte i kontaminuar mbi normat e sigurisë ushqimore.

Sipas njoftimit, pas marrjes së informacionit për një lot qumështi të dyshuar të shpërndarë në qytet, AKU nisi kontrolle intensive në markete dhe supermarkete të Vlorës, ku u evidentuan shkeljet.

Gjatë muajit mars, AKU ka kryer analiza të mostrave të mbledhura rastësisht si në tregtim ashtu edhe në prodhim. Rezultatet e kryera në Institutin e Sigurisë Ushqimore dhe Veterinare (ISUV) konfirmuan praninë e Aflatoksinës M1 në disa prej tyre. Kjo substancë, kur është e pranishme në qumësht, konsiderohet kancerogjene dhe gjenotoksike, duke përbërë rrezik të madh për shëndetin, veçanërisht për fëmijët dhe konsumatorët e rregullt.

AKU ka bërë të ditur se produktet e kontaminuara janë tërhequr menjëherë nga tregu, megjithatë ekziston dyshimi se një pjesë e këtij qumështi mund të jetë konsumuar para ndërhyrjes.