Pas një konflikti të ndodhur mesditën e sotme në rrugën “Ali Demi” në Tiranë, pranë zyrës elektorale të Partisë Socialdemokrate (PSD), ka ardhur një reagim zyrtar nga kjo forcë politike.

Në deklaratën për mediat, PSD mohon çdo lidhje me ngjarjen, duke sqaruar se asnjë nga anëtarët apo simpatizantët e saj nuk është përfshirë në konfliktin e ndodhur.

Reagimi i plotë i PSD-së:
“Partia Socialdemokrate sqaron opinionin publik se ngjarja e ndodhur këtë mesditë në rrugën ‘Ali Demi’, nuk ka asnjë lidhje me zyrën tonë elektorale apo me aktivitetin e Partisë Socialdemokrate.
Vendi ku ka ndodhur incidenti ndodhet pranë ambjenteve tona, por asnjë nga anëtarët apo simpatizantët tanë nuk ka qenë i përfshirë në konfliktin në fjalë.
Dënojmë çdo akt dhune dhe presim që organet kompetente të sqarojnë plotësisht rrethanat e ngjarjes.”

Pamjet e siguruara nga vendi i ngjarjes tregojnë dëmtimin e derës prej xhami të zyrës elektorale, për të cilën policia dyshon se është thyer me sende të forta.

Ndërkohë, autorët e përfshirë në konflikt janë larguar nga vendi i ngjarjes me një automjet dhe policia po vijon hetimet për identifikimin dhe kapjen e tyre. Ngjarja mbetet e hapur për sqarime të mëtejshme nga autoritetet.