Interpol Tirana njofton për finalizimin me sukses të dy ekstradimeve të rëndësishme në kuadër të bashkëpunimit ndërkombëtar për kapjen e personave në kërkim. Danjel Lalaj, 21 vjeç, dhe Kledjon Berberi, 35 vjeç, janë ekstraduar përkatësisht nga Gjermania dhe Italia drejt Shqipërisë, për t’u përballur me drejtësinë shqiptare.
Danjel Lalaj, i arrestuar në Gjermani, ishte shpallur në kërkim nga GJKKO, e cila në vitin 2021 kishte caktuar ndaj tij masën e sigurisë “Arrest me burg”, për veprat penale:
• “Kultivimi i bimëve narkotike”,
• “Grupi i strukturuar kriminal”,
• “Kryerja e veprave penale nga organizata kriminale dhe grupi i strukturuar kriminal”.
Kledjon Berberi, i arrestuar në Milano të Italisë, akuzohet nga Gjykata e Korçës për:
• “Heqja e paligjshme e lirisë” dhe
• “Kanosja për deklarime a dëshmi, ekspertim ose përkthim të rremë”.
Ngjarja për të cilën akuzohet 35-vjeçari ndodhi në qershor të vitit 2024, kur ai, në bashkëpunim me një person tjetër, dyshohet se mbajti me forcë brenda një automjeti dhe dhunoi rëndë shtetasin K. V.
Policia e Shtetit njofton se vijojnë bashkëpunimet me agjencitë ligjzbatuese ndërkombëtare për lokalizimin, arrestimin dhe ekstradimin e shtetasve të tjerë shqiptarë të shpallur në kërkim ndërkombëtar.
