Një ngjarje e pazakontë tronditi qytetin e Elbasanit në orët e para të 1 majit, kur një shpërthim me lëndë plasëse u regjistrua në lagjen “Partizani”, në banesën e 43-vjeçarit Arbër Pepa. Në momentin e ngjarjes në banesë nuk ndodhej askush, dhe fatmirësisht pati vetëm dëme materiale.
Menjëherë pas shpërthimit, Policia e Elbasanit nisi hetimet dhe kërkoi pamjet filmike të zonës, por nuk u arrit të identifikohej asnjë person i dyshuar. Hetimet morën një kthesë të papritur kur dyshimet u përqendruan te vetë pronari i banesës.
Operacioni “Inskenimi”
Falë të dhënave të mbledhura nga inteligjenca informative dhe dëshmisë së nipit të Pepës, 18-vjeçarit E. T., policia zbuloi se shpërthimi ishte inskenuar nga vetë Arbër Pepa në bashkëpunim me nipin e tij, me qëllim përfitimin e azilit në një vend të Bashkimit Evropian. Skema parashikonte që Pepa të largohej drejt Greqisë bashkë me bashkëshorten dhe fëmijën pak para shpërthimit, ndërsa nipi vendosi tritolin në hyrje të banesës.
Arbër Pepa u arrestua në tentativë për t’u arratisur, ndërkohë që nipi u prangos dhe bashkëpunoi me hetuesit duke rrëfyer planin dhe duke ndihmuar në lokalizimin e të afërmit të tij.
Policia njofton:
“Shtetasi A. P., në bashkëpunim me nipin E. T., ka vendosur lëndë eksplozive para banesës së tij me qëllim përfitimin e azilit në një nga vendet e BE-së. Si pasojë e shpërthimit janë shkaktuar vetëm dëme materiale.”
Autoritetet kanë publikuar gjithashtu pamje nga momenti i arrestimit të Pepës, i cili u lokalizua dhe kap nga strukturat e Policisë në kuadër të operacionit të koduar “Inskenimi”.
