Një operacion ndërkombëtar po zhvillohet në disa shtete përfshirë edhe Shqipërinë.

Autoritetet italiane dhe ato shqiptare kanë zhvilluar një operacion të përbashkët kundër trafikut të drogës, i cili ka çuar në ekzekutimin e 38 urdhër arrestesh për trafik ndërkombëtar droge, riciklim parash dhe korrupsion.

Miliona euro pasuri janë në proces konfiskimi teksa grupi i shënjestruar akuzohet për trafik droge, korrupsion, shpërdorim detyre e pastrim parash.

Arrestimet janë kryer nën bashkëpunimin e autoriteteve shqiptar SPAK, Antimafian Italiane, Zyrën e koordinimit policor Interforze në Tiranë, Policinë Shqiptare dhe Eurjust.

Mediat italiane raportojnë se operacioni për arrestim është kryer në Shqipëri, Mal i Zi, Spanjë e Itali.

Sot paradite priten detaje të reja nga operacioni gjatë një konference për shtyp ku i pranishëm do të jetë edhe drejtuesi i SPAK,Arben Kraja bashkë me drejtorin e Përgjithshëm të Policisë së Shtetit, Ardi Veliu.

Hetimet për këtë grup kriminal ka filluar nga viti 2018 me anë të dy operacioneve, “Shefi” e “Kulmi”, në këtë vit dhe në 2020 teksa tashmë janë lëshuar 38 urdhër-arreste ku të përfshirë janë dhe zyrtarë të shtetit.