Në Dibër, ka nisur që në orën 11:00 të paradites shpërndarja e materialeve zgjedhore në kuadër të zgjedhjeve parlamentare të 11 majit. Në KZAZ nr. 18, e cila përfshin 49 qendra votimi dhe një numër prej 27,000 votuesish, procesi ka vijuar pa probleme dhe në qetësi.

Në shkallë kombëtare, 3.7 milionë qytetarë shqiptarë do t’i drejtohen kutive të votimit të dielën për të zgjedhur 140 deputetët e rinj të Kuvendit të Shqipërisë.

Për herë të parë në historinë zgjedhore të vendit, është përfshirë edhe diaspora shqiptare, me 245,935 emigrantë të regjistruar për të votuar, megjithatë janë hasur probleme në dërgimin dhe kthimin e zarfeve, veçanërisht në Greqi.

Në këto zgjedhje marrin pjesë 11 subjekte apo koalicione politike, secili me 186 kandidatë në listë, nga të cilët 46 janë në “listën e sigurt” për t’u zgjedhur.