Sipas dokumenteve të dorëzuara pranë Departamentit Amerikan të Drejtësisë nëpërmjet regjistrit FARA (Foreign Agents Registration Act), mësohet se ish-kryeministri shqiptar Sali Berisha ka kërkuar dy herë vizë për të udhëtuar në SHBA, por kërkesat e tij janë injoruar nga Departamenti i Shtetit amerikan.

Kërkesa e parë është bërë më 28 mars 2021, vetëm tre ditë para nisjes së fushatës zgjedhore të atij viti. Iniciativa ishte ndërmarrë nga një shoqatë shqiptaro-amerikane, që kërkonte një vizë njëkalimëshe për Berishën, në mënyrë që ai të zhvillonte takime me diasporën shqiptare në SHBA.

Pas më shumë se një muaji pa përgjigje, më 1 maj 2021, është dërguar një kërkesë e dytë, kësaj here me kërkesën për rishikimin e sanksioneve ndaj tij dhe mundësimin e udhëtimit në SHBA. Kërkesa është bërë përmes kompanisë lobuese amerikane “Continental Strategy”, e lidhur me Partinë Demokratike të Shqipërisë.

Megjithatë, Departamenti i Shtetit nuk ka reaguar zyrtarisht ndaj asnjërës prej kërkesave dhe Berisha mbetet në listën e personave “non grata” në SHBA, që nga shpallja e sanksioneve nga administrata e Presidentit Joe Biden në maj të vitit 2021. Asnjë sinjal nuk është dhënë deri tani për ndonjë rishqyrtim apo ndryshim të vendimit nga pala amerikane.