Një ngjarje alarmante ka ndodhur në muajin shkurt gjatë një fluturimi të kompanisë Lufthansa, ku një avion tip Airbus A321 që udhëtonte nga Frankfurti drejt Seviljes, ka mbetur për rreth 10 minuta pa një pilot aktiv, pasi bashkëpiloti humbi ndjenjat ndërsa ndodhej i vetëm në kabinën e pilotit.

Sipas raportit përfundimtar të autoriteteve ajrore spanjolle, që u publikua ditën e enjte, incidenti ndodhi kur avioni kishte hyrë në hapësirën ajrore spanjolle dhe ndodhej afërsisht 30 minuta larg destinacionit. Në atë moment, kapiteni i avionit ishte larguar përkohësisht nga kabina për arsye personale, pasi kishte verifikuar se bashkëpiloti ishte në gjendje të mirë.

Por situata mori për keq kur kapiteni u përpoq të rikthehej tetë minuta më vonë dhe gjeti derën e kabinës të mbyllur dhe bashkëpilotin pa ndjenja. Ai tentoi pesë herë të futë fjalëkalimin, ndërkohë që një asistente fluturimi u përpoq të komunikonte përmes interfonit, pa sukses.

Për fat, mekanizmi i aksesit emergjent u aktivizua dhe, pak para se të skadonte kohëmatësi i sistemit, bashkëpiloti rifitoi pjesërisht vetëdijen dhe hapi derën. Ai u përshkrua si i zbehtë, i djersitur dhe me lëvizje të pazakonta.

Kapiteni ndërhyri menjëherë dhe kërkoi ndihmën e ekuipazhit dhe të një mjeku që ndodhej në bord. Në konsultim me kontrollin e trafikut ajror, ai vendosi të devijonte fluturimin për në Madrid, ku u ofrua ndihma e nevojshme mjekësore.

Në bord ndodheshin mbi 200 pasagjerë, të cilët, falë ndërhyrjes së shpejtë dhe procedurave të sigurisë, shmangën një fatkeqësi të mundshme. Autoritetet po hetojnë më tej rrethanat shëndetësore të bashkëpilotit dhe efikasitetin e protokolleve të sigurisë në raste emergjente.