Policia e Tiranës ka finalizuar me sukses një tjetër operacion kundër mashtrimeve financiare. Komisariati i Policisë Nr. 1, nën drejtimin e Prokurorisë, ka kryer arrestimin e një 64-vjeçari të identifikuar si S. L., banues në Tiranë, në kuadër të operacionit të koduar “The Friend”.

Sipas hetimeve të zhvilluara me metoda proaktive, shtetasi në fjalë përfitonte shuma të ndryshme parash, nga 500 deri në 1000 euro, duke mashtruar qytetarë të ndryshëm. Ai u paraqitej viktimave si “miku i fëmijëve të tyre që jetonin jashtë vendit”, duke fituar kështu besimin e tyre dhe duke i bindur të dorëzonin para.

Burime zyrtare bëjnë me dije se S. L. ka qenë më parë i dënuar për të njëjtën veprimtari kriminale.

Materialet hetimore i janë referuar Prokurorisë për veprime të mëtejshme procedurale. Policia vijon punën për identifikimin e rasteve të tjera të mundshme dhe nxit qytetarët të denoncojnë çdo tentativë mashtrimi të ngjashme.