Një ngjarje e rëndë ka tronditur opinionin publik në Meksikë dhe më gjerë: Valeria Márquez, një influencuese 23-vjeçare me afro 200,000 ndjekës në Instagram dhe TikTok, u vra me armë zjarri në mënyrë brutale gjatë një transmetimi të drejtpërdrejtë në TikTok.

Ngjarja ndodhi në sallonin e bukurisë ku Márquez punonte, në qytetin e Zapopan të rajonit të Jaliscos. Sipas autoriteteve meksikane, ngjarja po hetohet si një femicid – një vrasje e kryer për shkak të gjinisë së viktimës. Prokurori rajonal konfirmoi se janë duke analizuar nëse krimi përfshinte elementë si dhunë degraduese, abuzim seksual apo një marrëdhënie të mëparshme me autorin e mundshëm.

Pamjet nga transmetimi live tregojnë momentet e fundit të jetës së 23-vjeçares. Ajo shfaqet e ulur, duke mbajtur në krahë një lodër pellushi. Në një moment dëgjohet të thotë: “Ata po vijnë,” pak çaste përpara se një zë mashkulli të thërrasë: “Hej, Vale?” – dhe ajo t’i përgjigjet: “Po.” Më pas dëgjohen të shtënat fatale, të cilat i morën jetën në vend.

Më herët gjatë videos, Márquez kishte ndarë me ndjekësit një shqetësim personal, duke treguar se dikush kishte ardhur në sallon me një “dhuratë të shtrenjtë” për të, në një kohë kur ajo nuk ndodhej aty, dhe se ndjehej e kërcënuar nga mundësia që ai person të kthehej.

Autoritetet nuk kanë dhënë ende detaje mbi identitetin e autorit të dyshuar, ndërsa hetimet janë në vijim.

Vrasja e Valeria Márquez ka hapur një debat të gjerë në Meksikë për sigurinë e grave, rritjen e femicideve dhe rolin e rrjeteve sociale në ekspozimin e individëve ndaj dhunës. Reagimet në rrjet kanë qenë të shumta dhe të tronditura, me përdorues që kërkojnë drejtësi për Valerian dhe dënim të autorit të krimit makabër.