Tiranë – Presidentja e Komisionit Evropian, Ursula von der Leyen, e ka cilësuar mbajtjen e Samitit të Komunitetit Politik Evropian në kryeqytetin shqiptar si një moment historik dhe simbolik për Ballkanin Perëndimor.
Në një postim në rrjetin social X, von der Leyen theksoi se pavarësisht shiut të rrëmbyeshëm që ra gjatë ngjarjes, kjo nuk e zbehu aspak entuziazmin dhe moralin e pjesëmarrësve. Ajo falënderoi kryeministrin Edi Rama për mikpritjen e jashtëzakonshme, duke vlerësuar takimin si një “simbol të fuqishëm” që pasqyron lidhjet e ngushta midis rajonit dhe Bashkimit Evropian.
Ky ishte takimi i parë i këtij lloji në Ballkanin Perëndimor, duke dëshmuar për angazhimin e palëkundur të BE-së në rrugën e integrimit të vendeve të rajonit.
“Familja jonë evropiane e vlerave shtrihet përtej kufijve të Bashkimit Evropian. Ndajmë një kontinent dhe një të ardhme të përbashkët,” tha von der Leyen, duke dërguar një mesazh të fuqishëm për një të ardhme të qëndrueshme dhe bashkëpunuese mes Europës dhe Ballkanit.
Samiti i zhvilluar në Tiranë konfirmon rëndësinë e rolit të Shqipërisë si urë lidhëse në këtë proces dhe nxit besimin për perspektivën europiane të rajonit.
