Një ngjarje e rëndë kriminale ka tronditur mëngjesin e sotëm zonën e Nea Liosia në Greqi, ku persona ende të paidentifikuar hapën zjarr me breshëri kallashnikovi ndaj një automjeti të blinduar në lëvizje.

Sipas mediave greke, dy autorët e armatosur udhëtonin me një motoçikletë dhe kanë qëlluar në drejtim të automjetit, në të cilin ndodhej vetëm shoferi – një person i njohur për autoritetet. Fatmirësisht, ai ka arritur të shpëtojë pa lëndime, falë mbrojtjes së blinduar të makinës.

Menjëherë pas sulmit, shoferi ka lajmëruar policinë dhe ka treguar se ishte ndjekur nga motoçikleta që më parë. Njësitë speciale dhe ekspertë kriminalistikë ndodhen në vendngjarje, ndërsa hetimet janë në zhvillim për të identifikuar dhe arrestuar autorët e dyshuar.

Policia nuk ka dhënë ende detaje mbi motivet e sulmit, por pista kryesore lidhet me përfshirjen e mundshme të viktimës së synuar në aktivitete kriminale. Rasti mbetet nën hetim intensiv.