Policia e Elbasanit ka finalizuar me sukses operacionin policor të koduar “Shënkolli”, duke çuar në pranga një 30-vjeçar me precedent të mëparshëm penal për vjedhje. Shtetasi M. K., banues në fshatin Shushicë, u identifikua dhe u arrestua nga Specialistët për Hetimin e Krimeve të Komisariatit të Policisë Elbasan, pas një hetimi të shpejtë dhe profesional.

Ngjarja ndodhi në lagjen Shënkoll, ku gjatë natës së 16 majit 2025, i riu dyshohet se ka vjedhur çelësat e një automjeti brenda një lokali dhe më pas është larguar me mjetin në pronësi të shtetasit A. Sh.. Për t’i shpëtuar ndjekjes së policisë, autori ka braktisur automjetin, të cilin po e drejtonte pa leje drejtimi.

Falë veprimeve të menjëhershme hetimore dhe inteligjencës policore, 30-vjeçari është lokalizuar dhe kapur nga uniformat blu, ndërsa ndaj tij tashmë janë referuar materialet procedurale në Prokurorinë pranë Gjykatës së Elbasanit, për veprime të mëtejshme.

Policia e Elbasanit siguron qytetarët se është e angazhuar për garantimin e rendit dhe sigurisë, si dhe për ndëshkimin e çdo akti kriminal.