New Orleans është tronditur nga një arratisje masive të burgosurish, pasi 11 persona kanë mundur të largohen nga një burg i qytetit, duke vënë në alarm autoritetet vendase dhe popullsinë.

Lajmin e konfirmoi zyrtari i policisë, Christopher Goody, i cili në një konferencë për shtyp deklaroi:
“Herët këtë mëngjes u njoftuam se afërsisht 11 persona ishin arratisur nga një burg i qytetit. Të gjithë të dyshuarit konsiderohen të armatosur dhe të rrezikshëm.”

Një nga të arratisurit është arrestuar në mëngjesin e së dielës në qendrën historike të qytetit, sipas një njoftimi nga Policia Shtetërore e Luizianës, e cila konfirmoi se operacioni për kapjen e të tjerëve është ende në vijim.

Sipas burimeve mediatike lokale, disa prej të arratisurve akuzohen për vrasje, duke shtuar ndjeshëm shqetësimin në opinionin publik dhe vështirësinë e operacionit të kapjes.

Autoritetet u kanë bërë thirrje qytetarëve të qëndrojnë vigjilentë dhe të raportojnë menjëherë çdo informacion të mundshëm në lidhje me vendndodhjen e të arratisurve. Ndërkohë, hetimet kanë nisur për të zbuluar mënyrën se si ndodhi arratisja dhe nëse është ndihmuar nga ndonjë element i brendshëm i stafit të burgut.

Ngjarja konsiderohet një nga arratisjet më serioze në vitet e fundit në SHBA, duke vënë në diskutim sigurinë në sistemin penitenciar të Luizianës.