POGRADEC – Një ngjarje e rëndë dhune në familje është regjistruar në fshatin Çërravë, ku një 50-vjeçar, bashkë me bashkëshorten e tij 49-vjeçare dhe djalin 27-vjeçar, dyshohet se kanë ushtruar dhunë ndaj nënës dhe motrave të 50-vjeçarit.

Sipas njoftimit zyrtar të Policisë së Pogradecit, në pranga kanë rënë bashkëshortët I. B. (50 vjeç) dhe E. B. (49 vjeçe), ndërsa është proceduar penalisht djali i tyre, Xh. B. (27 vjeç).

“Specialistët për Hetimin e Krimeve të Komisariatit të Policisë Pogradec arrestuan në flagrancë shtetasit I. B. dhe E. B., ndërsa referuan materialet në Prokurori ku nisi procedimi penal për djalin e tyre Xh. B., pasi dyshohet se kanë ushtruar dhunë ndaj nënës dhe motrave të 50-vjeçarit”, thuhet në deklaratën e Policisë.

Ngjarja është një tjetër rast i dhimbshëm që rikthen në vëmendje problematikën e dhunës në familje, ku viktima janë shpesh gratë dhe të moshuarit.

Hetimet vijojnë për zbardhjen e plotë të rrethanave dhe motivit të këtij akti të rëndë.