Pak ditë pas pjesëmarrjes në Samitin e Tiranës, ku u ul në tryezë me liderët europianë dhe u prit nga Kryeministri Edi Rama, Presidenti i Serbisë, Aleksandër Vuçiç, zgjodhi një tjetër skenë për të dhënë një mesazh simbolik e të drejtpërdrejtë: këtë herë, në një tubim të partisë së tij SNS, me një urdhër të koduar sportivo-politik drejtuar trajnerit të kombëtares serbe të futbollit, Dragan Stojkoviç.

“Në qershor luani atje kundër Shqipërisë, për t’i mposhtur ata!”, deklaroi Vuçiç nga podiumi, ndërsa Stojkoviç buzëqeshte i qetë dhe përtypte çamçakëzin nën blicet e kamerave.

Edhe pse fjalët u thanë në kontekstin e një ngjarjeje sportive, toni urdhërues dhe momenti politik në të cilin u bë kjo deklaratë – në prag të ndeshjes së 7 qershorit Shqipëri-Serbi – i dhanë ngarkesë të fortë simbolike. Aq më tepër kur vinte nga një lider që pak ditë më parë kishte zgjedhur gjuhën e qetë diplomatike gjatë qëndrimit në Tiranë.

Në këtë sfond, kontrasti mes diplomacisë së buzëqeshur në samit dhe retorikës së fortë kombëtare në një miting partie është i dukshëm. Edhe pse në fushën e futbollit, mesazhi politik i Vuçiçit është i qartë: rivaliteti mes Shqipërisë dhe Serbisë nuk është fashitur dhe emocionet kombëtare mund të shfrytëzohen ende si mjet për përforcimin e pozicioneve politike.

Ndeshja Shqipëri–Serbi, e planifikuar për 7 qershor, gjithmonë ka qenë e ndjeshme për shkak të historisë së tensionuar mes dy vendeve. E tani, me deklarata të tilla, pritet që tensioni përtej sportit të jetë sërish pjesë e atmosferës së ndeshjes.