Ismail Gjineci, 34 vjeç, banues në Tiranë dhe i dënuar më herët për trafikim të qenieve njerëzore, është vënë sërish nën hetim, këtë herë për pasuritë e dyshuara si të përfituara nga aktiviteti kriminal.
Në kuadër të operacionit policor të koduar “Real Owner”, të zhvilluar nga Seksioni për Hetimin e Pastrimit të Parave dhe Aseteve Kriminale, në bashkëpunim me Agjencinë e Administrimit të Aseteve të Sekuestruara dhe të Konfiskuara, u vendos sekuestro preventive ndaj një apartamenti, dy automjeteve dhe rreth 228 mijë eurove, pasuri të cilat ishin regjistruar në emër të babait të Gjinecit.
Sipas dyshimeve të hetuesve, regjistrimi i këtyre pasurive në emër të një të afërmi synonte fshehjen e origjinës së paligjshme të tyre.
Operacioni u zhvillua nën drejtimin e Prokurorisë së Tiranës, e cila vijon hetimet për të identifikuar pasuri të tjera të mundshme të 34-vjeçarit që mund të jenë fshehur përmes emrave të tretë. Materialet hetimore janë referuar për ndjekje të mëtejshme pranë Prokurorisë së Tiranës.
Njoftimi i Policisë së Tiranës:
“Finalizohet operacioni policor i koduar ‘Real Owner’, për gjurmimin e pasurive që rrjedhin nga veprimtaria kriminale. Sekuestrohen pasuri të një shtetasi të dënuar për trafikim të qenieve njerëzore. Pasuritë, me vlerë rreth 228 mijë euro, përfshirë 1 apartament dhe 2 automjete, ishin regjistruar në emër të babait të tij.”
Autoritetet paralajmërojnë zgjatje të hetimeve dhe priten masa të tjera shtesë për identifikimin dhe sekuestrimin e pasurive që rrjedhin nga veprimtari të paligjshme.
