Një ngjarje e rëndë ka ndodhur të dielën në Halle (Saale), Gjermani, ku tre persona, mes tyre një vajzë 11-vjeçare, janë plagosur pas një sulmi me thikë që ndodhi në një zonë të banuar, përpara një ndërtese.
Sipas policisë gjermane, ngjarjes i ka paraprirë një debat verbal rreth zhurmës së fëmijëve, i cili më pas ka degjeneruar në dhunë fizike. Autori i dyshuar është një 46-vjeçar me origjinë nga Kosova, i cili është arrestuar menjëherë pas incidentit.
Nga sulmi mbetën të plagosur:
• Një vajzë 11-vjeçare, me lëndime të lehta
• Dy burra, të moshës 29 dhe 47 vjeç, ku njëri ndodhet në gjendje të rëndë shëndetësore
Të plagosurit u transportuan në spital për trajtim mjekësor.
Një dëshmitar okular tha për mediat se autori kishte përdorur një thikë të gjatë, ndërsa fëmijët ndodheshin të ulur pranë hyrjes së ndërtesës në momentin e sulmit.
Hetimet vijojnë, ndërsa autoritetet nuk kanë dhënë ende detaje shtesë mbi motivet e sulmit apo lidhjen mes autorit dhe viktimave. Policia po punon për të zbardhur rrethanat e plota të kësaj ngjarjeje tronditëse.
