Në një nga operacionet më të mëdha antiterroriste të viteve të fundit, autoritetet turke kanë arrestuar 298 persona të dyshuar për lidhje me organizatën terroriste ISIS, bëri të ditur Ministri i Punëve të Brendshme të Turqisë, Ali Yerlikaya. Lajmi u raportua nga televizioni shtetëror TRT Haber.

“Operacioni u zhvillua në 47 provinca dhe synoi individë që dyshohet se po financonin, organizonin dhe përhapnin propagandën e ISIS-it në Turqi”, tha Yerlikaya.

Ndër të arrestuarit, 139 persona janë identifikuar si të përfshirë në sigurimin e fondeve financiare për grupin, ndërsa të tjerët dyshohet se kanë kryer propagandë në mbështetje të ISIS.

Provincat ku u zhvilluan bastisjet përfshijnë Stambollin, Izmirin, Ankaranë, Adananë, Antalian, Sanliurfën, Vanin dhe shumë të tjera. Gjatë operacioneve, autoritetet sekuestruan armë zjarri, dokumente të shumta të lidhura me grupin terrorist dhe materiale dixhitale.

Operacioni u drejtua nga Departamenti Kundër Terrorizmit i Komandës së Përgjithshme të Xhandarmërisë dhe u zbatua në bashkëpunim me zyrat e prokurorëve të provincave përkatëse.

“Nuk do të lejojmë asnjë celulë terroriste të kërcënojë sigurinë e qytetarëve tanë,” deklaroi Yerlikaya.

ISIS (i njohur edhe si Shteti Islamik) është shpallur organizatë terroriste nga Turqia, SHBA, Bashkimi Evropian dhe Kombet e Bashkuara, dhe është përgjegjës për një sërë sulmesh të përgjakshme në Turqi dhe në mbarë botën.