Kreu i Partisë Demokratike, Sali Berisha, ka deklaruar se zgjedhjet parlamentare të 11 majit nuk mund të konsiderohen zgjedhje të lira dhe të ndershme, duke i cilësuar ato si një “farsë elektorale”. I ftuar në një emision televiziv, Berisha theksoi se procesi elektoral u zhvillua në kushte të pabarabarta për subjektet politike dhe se u shkelën rregulla thelbësore të barazisë demokratike.

“Ti flet për zgjedhje, unë flas për farsë. Janë dy gjëra të ndryshme. 99% e vendeve zhvillojnë zgjedhje, por narko-diktatura zhvillon farsa elektorale. 11 maji ishte një farsë absolute”, u shpreh Berisha.

Ai nënvizoi se janë të paktën 16 dokumente ndërkombëtare që garantojnë zhvillimin e zgjedhjeve të lira, të cilat sipas tij janë shkelur një për një në këtë proces.

“Këto që po them unë i ka konstatuar edhe ODIHR. Ata thonë se subjektet patën të drejtën të marrin pjesë në zgjedhje, por në një fushë të pabarabartë. Është dhunuar dokumenti i Kopenhagenit”, shtoi më tej lideri demokrat.

Deklaratat e Berishës vijnë në një kohë kur përfundimet e zgjedhjeve të 11 majit vijojnë të jenë objekt debati në opinionin publik dhe politik, ndërsa raportet ndërkombëtare kanë theksuar shqetësime për klimën e pabarazisë dhe përdorimin e burimeve shtetërore gjatë fushatës.