Termi “Treni bullgar” po përdoret shpesh nga kreu i Partisë Demokratike, Sali Berisha, dhe përfaqësues të opozitës si një nga skemat e manipulimit që sipas tyre është përdorur gjatë zgjedhjeve parlamentare të 11 majit në Shqipëri.

Fillimisht, dyshimi u ngrit nga një numëruese e PD-së në Njësinë 9 në Tiranë, e cila vuri re se një tufë fletësh votimi ishin palosur në mënyrë identike dhe kishin votuar të gjitha për Partinë Socialiste. Ky incident ngjalli dyshime për blerje votash dhe manipulim në procesin e numërimit.

Më pas, opozita përmendi këtë term edhe pasi në qendrën e numërimit të votave në “Sami Frashëri” u gjetën disa fletë votimi që kishin një ngjyrë pak më të zbehtë sesa fletët e tjera, duke shtuar dyshimet për manipulime të koordinuara.

Por çfarë është “Treni bullgar”? Ky është një skemë e njohur nga zgjedhjet e vitit 2009 në Bullgari, ku qytetarët që shisnin votën merrnin në hyrje të qendrave të votimit një fletë votimi të plotësuar paraprakisht. Ata hynin brenda, përdornin këtë fletë për të votuar dhe dilnin jashtë me një fletë bosh. Fleta bosh më pas plotësohej dhe i jepet një tjetër votuesi, duke krijuar një “rrugë” të vazhdueshme blerjeje votash, prandaj edhe emri “Treni bullgar”.

Në zgjedhjet bullgare të asaj kohe, kjo skemë rezultoi në blerjen e rreth 300 mijë votave, kryesisht nga komuniteti i varfër i romëve në Bullgari.

Në Shqipëri, opozita ka pretenduar se skema “Treni bullgar” është aplikuar në mënyrë të organizuar në njësitë zgjedhore të Tiranës dhe Elbasanit, duke akuzuar institucionet për dështim në mbrojtjen e procesit zgjedhor dhe për lehtësim të manipulimeve.

Këto akuza janë pjesë e një debati të fortë politik dhe po kërkojnë verifikim nga institucionet përkatëse, ndërsa zgjidhja e çështjes do të jetë thelbësore për besueshmërinë e proceseve zgjedhore në Shqipëri.