Gazetarja Anila Hoxha ka komentuar arrestimin në Brazil të Ervin Matës, i cili akuzohet për përfshirje në trafikun ndërkombëtar të kokainës nga Amerika Latine drejt Europës.

Sipas saj, hapi i parë procedural i takon Prokurorisë së Posaçme (SPAK), e cila ka shpallur në kërkim Matën dhe pritet të nisë dokumentacionin për kërkesën e ekstradimit.

“Çfarë do të bëjë SPAK? Hapi i parë hidhet nga Prokuroria e Posaçme, pasi kjo e fundit e ka shpallur në kërkim Ervin Matën për trafikim kokaine në Europë. Por duhet parë nëse Shqipëria ka marrëveshje ekstradimi me Brazilin. Do të jetë Brazili që do të verifikojë dosjen e tij,” u shpreh Hoxha.

Ajo theksoi se procesi varet edhe nga qëndrimi i autoriteteve braziliane, të cilat mund të hetojnë çështjet e tij në vend përpara çdo vendimi për ekstradim.

“Nëse Ervin Mata ka probleme ligjore në Brazil, atëherë do të vendoset nëse ai do të gjykohet aty apo do të ekstradohet në Shqipëri. SPAK ndërkohë nis procedurat përkatëse dhe përgatit dokumentacionin e nevojshëm,” shtoi gazetarja.

Sipas Hoxhës, në ditët në vijim pritet që Prokuroria e Posaçme të formalizojë kërkesën për ekstradimin e Matës drejt Shqipërisë.