Martin Henze, Kryetar i Komisionit të Transportit, Infrastrukturës dhe Lëvizshmërisë në Këshillin Ekonomik të CDU-së Veriore në Gjermani, ka reaguar me tone të forta ndaj situatës politike në Shqipëri pas zgjedhjeve parlamentare të 11 majit 2025, të cilat i konsideron si një farsë të manipulimit elektoral.

Në një postim në Facebook, Henze i ka dalë hapur në mbështetje të liderit të opozitës Sali Berisha, duke akuzuar qeverinë e Edi Ramës për manipulim të zgjedhjeve dhe falsifikim të vullnetit të qytetarëve shqiptarë.

“Sali Berisha, lideri i PD-së, nuk i ka manipuluar zgjedhjet. ‘Fituesit’ e zgjedhjeve parlamentare të vitit 2025 i kanë manipuluar rezultatet me ndihmën e ‘nëndetëseve’ brenda partisë sonë simotër,” – shkruan Henze.

Ai shton se të gjitha përpjekjet për të kërkuar dorëheqjen e Berishës që nga viti 2021 deri më sot janë sipas tij të udhëhequra nga “kukulla të Ramës ose oportunistë” dhe i cilëson ata si armiq të demokracisë.

Në reagimin e tij, Henze citon edhe gazetën gjermane Bild Zeitung, duke kujtuar përshkrimin që kjo e fundit i ka bërë qeverisë shqiptare si një “qeveri mafioze”. Ai shprehet prerë se një administratë që, sipas tij, “abuzon me paratë e taksapaguesve të BE-së” dhe “mbijeton përmes zgjedhjeve të manipuluara”, nuk ka vend në Europë.

“Ekzekutivi i hajdutëve nuk ka vend në Europë,” – thekson ai.

Në përfundim, Henze bën thirrje për rrëzimin e administratës Rama, për neutralizimin politik të “nëndetëseve” në opozitë dhe mbajtjen e zgjedhjeve të reja, të organizuara nën vëzhgimin dhe garancinë e OSBE-së.

Ky reagim i ashpër vjen në një kohë të tensionuar politike në vend, ku akuzat për manipulime dhe mungesë transparence në procesin zgjedhor kanë zënë një vend qendror në debatin publik dhe institucional.