Presidenti serb Aleksandër Vuçiç ka reaguar ashpër ndaj protestave studentore që prej gjashtë muajsh kanë paralizuar universitetet publike në vend, duke i akuzuar organizatorët dhe mbështetësit e tyre për “krime të rënda kundër Serbisë”. Në një intervistë për televizionin provladar TV Pink, Vuçiç tha se përgjegjës për humbjen e dijes te fëmijët serbë janë profesorët dhe mësuesit që “kanë kryer revolucion me ngjyra”.

“Një krim i tmerrshëm është kryer kundër Serbisë. Ata do të duhet të përgjigjen për atë që i kanë bërë këtij vendi,” deklaroi Vuçiç, duke mbështetur deklaratat e historianit Çedomir Antiç, i cili kishte krahasuar situatën e tanishme të arsimit me periudhën e pushtimit nazist: “As gjermanët në Luftën e Dytë Botërore nuk e shkatërruan arsimin siç është shkatërruar në gjashtë muajt e fundit.”

Protestat studentore, të cilat filluan pas tragjedisë së 1 nëntorit 2024 në Novi Sad, ku humbën jetën 16 persona nga shembja e një tende në një stacion hekurudhor, janë kthyer në një lëvizje më të gjerë kundër korrupsionit, mungesës së transparencës dhe mungesës së meritokracisë në Serbi. Studentët kërkojnë që përgjegjësit për ngjarjen tragjike të mbahen ligjërisht përgjegjës.

Vuçiç kritikoi gjithashtu presionet ndërkombëtare dhe ndikimin e opozitës që, sipas tij, po përpiqen të destabilizojnë qeverinë. Ai përmendi 82 herë që është shpallur i “rënë politikisht” nga mediat kundërshtare, duke shtuar me ironi: “E dini kur doli për herë të parë titulli ‘Evropa po e rrëzon Vuçiçin’? Në dhjetor 2014.”

Ndërkohë, presidenti serb përsëriti qëndrimin se zgjedhjet do të shpallen vetëm kur të jetë e nevojshme, duke u bërë thirrje qytetarëve të përqendrohen te rritja e pagave dhe pensioneve, ndërsa theksoi rëndësinë e ruajtjes së pavarësisë dhe shpirtit libertarian të popullit serb, duke e konsideruar të papranueshëm çdo diktim nga jashtë.