Policia Kufitare në bashkëpunim me Drejtorinë Vendore të Policisë Kukës ka finalizuar me sukses një operacion të shpejtë në pikën kufitare të Morinës, duke goditur një rast të tentativës për trafikim të lëndëve narkotike. Si rezultat, u arrestua në flagrancë shtetasi P. G., 35 vjeç, banues në Fier.

Gjatë një kontrolli të imtësishëm në vijën e dytë, mbi bazën e analizës së riskut dhe përzgjedhjes së automjeteve, shërbimet e Policisë Kufitare ndaluan automjetin tip “Audi” që drejtohej nga i dyshuari. Gjatë kontrollit, brenda mjetit u gjetën të fshehura dy pako me lëndë të dyshuar narkotike, kanabis, me peshë totale 2 kilogramë e 227 gramë.

Menjëherë pas zbulimit, mjeti u sekuestrua dhe ndaj 35-vjeçarit u mor masa e arrestit në flagrancë. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme ligjore.

Policia Kufitare nënvizon se kontrollet intensive në pikat kufitare do të vijojnë, me qëllim parandalimin dhe goditjen e krimeve kufitare dhe trafikimeve të paligjshme.