Dy nga figurat më të errëta të krimit shqiptar në Itali, Elvis Demçe dhe Ermal Arapaj, janë dënuar përfundimisht me dhjetëra vite burg për trafik ndërkombëtar droge dhe përfshirje në organizata kriminale.

Elvis Demçe, i njohur si “Zoti i drogës”, do të vuajë 15 vjet burg, pasi Gjykata e Kasacionit italiane i uli me 3 vite dënimin e mëparshëm prej 18 vitesh, të dhënë me procedurë të shkurtuar. Ndërkohë, Ermal Arapaj, i njohur me nofkën “Ufo”, do të qëndrojë pas hekurave për 10 vjet, pas një uljeje prej 6 vitesh nga dënimi fillestar prej 16 vitesh.

Të dy shqiptarët ishin në krye të dy organizatave kriminale rivale që kontrollonin me dorë të hekurt tregun e drogës në zonat e Romës, Acilia-s dhe Velletri-t. Konfliktet mes tyre ishin të vazhdueshme dhe shpeshherë përfundonin me armë, atentate dhe djegie pronash, duke terrorizuar banorët lokalë.

Demçe, i përfolur për lidhjet e tij me grupin famëkeq italian Camorra, kishte fituar një famë të frikshme për arrogancën e tij, madje në një komunikim të përgjuar deklaronte: “Unë jam Zoti”. Ndërkohë, Arapaj, dikur mik i tij, përfitoi nga burgosja e Demçes për të rimarrë territoret e kontrolluara, duke ndezur një luftë të egër për dominim.

Dosja voluminoze e përgatitur nga prokurorët Mario Palazzi dhe Francesco Cascini dokumenton përleshje të shumta mes grupeve, përfshirë atentatin ndaj Arapajt në korrik 2020 dhe djegien e një vile të tij në Velletri më 5 shtator 2024. Në një moment, Demçe madje kishte planifikuar vrasjen e prokurorit Cascini – një fakt që forcoi më tej akuzat ndaj tij.

Pas një hetimi disa-vjeçar dhe qindra orësh përgjime, dy krerët e bandave përfunduan pas hekurave, duke dhënë një goditje të fortë për krimin e organizuar në Itali dhe Shqipëri.